Balance moi positivo do "I CLINIC J80 A CORUÑA"

O Real Club Náutico Da coruña como unha das accións de promoción do próximo campionato de España da clase J80 a celebrar os días 8 ao 11 de xullo, organizou este adestramento para a frota local, ao que se invitou renomeados regatistas desta clase, entre os que destacaban o Murciano Carlos Martínez (3º no Mundial 2009 en Santander e 3º no Mundial 2008 de Kiel), o santanderino José María Torcida ( Campión do Mundo 2007 en La Trinité francesa e 6º no mundial 2009 de Santander) e o Bilbaino Peru Múgica

Luns, 8 de febreiro de 2010. -Intensa actividade no Real Club Náutico Da coruña durante o pasado fin de semana coa celebración do "I CLINIC J80 A CORUÑA" e a última proba do X CIRCUÍTO DE INVERNO para a clase Cruceiro.
O Real Club Náutico Da coruña como unha das accións de promoción do próximo campionato de España da clase J80 a celebrar os días 8 ao 11 de xullo, organizou este adestramento para a frota local, ao que se invitou renomeados regatistas desta clase, entre os que destacaban o Murciano Carlos Martínez (3º no Mundial 2009 en Santander e 3º no Mundial 2008 de Kiel), o santanderino José María Torcida ( Campión do Mundo 2007 en La Trinité francesa e 6º no mundial 2009 de Santander) e o Bilbaino Peru Múgica. Ás 10.30 horas comezaban os J80s cunha charla-coloquio dirixida por Carlos Martínez, sobre a posta a punto e velocidade neste monotipo. Durante este os regatistas locais tomaron boa nota dos consellos recibidos e ademais puideron aclarar dúbidas. Ao finalizar, as tripulacións fixéronse á auga para un adestramento, no que os convidados navegaron nos barcos cos armadores locais, e puideron poñer en práctica o exposto durante a mañá, facendo especial fincapé no posicionamento nas saídas. Ao volver do mar analizáronse os videos do adestramento do día, no que se estudaron as imaxes, sempre co obxectivo de mellorar a posta a punto, velocidade e manobra.
A xornada clausurouse cunha cea na que regatistas e convidados compartiron mesa, valorando positivamente a actividade e os coñecementos adquiridos durante os adestramentos.
O domingo celebrouse a terceira e última proba do Circuíto de Inverno para a clase Crucero sobre un percorrido de máis de 8 millas na baía Da coruña, cun vento variable entre o sur e o sueste, complicando moito a navegación. O primeiro barco en virar a baliza de desmarque foi o "Salseiro" de Manuel Blanco, que se mantivo nesta posición toda a proba, finalizando en primeira posición tanto en tempo real como compensado, seguido polo "Riás" de Ramón Carnota e do "X-Grog" de Ricardo Vara. A clasificación xeral gañouna o "Riás" por diante do "Esoga" de Fran Edreira e do "Salseiro". Na clase cruceiro-regata, o vencedor desta última etapa foi o "Argallán" de Domingo Plana cunha vantaxe de 22 segundos sobre o "Patacón" de José M. Ubago e o "Fucus" de Ricardo Álvarez. En palabras de Domingo Plana: "Creo que a clave da vitoria de hoxe estivo no tramo Mera - Oza, cando a maioría da frota tomou a opción de irse cara ao dique de abrigo, mentres que nós fomos cara á esquerda máis pegados a terra.
Ao finalizar a regata celebrouse a tradicional "laconada" na que os regatistas puideron compartir mesa e comentar a proba celebrada, así como a tempada de regatas que comeza.

«VOLVER Á LISTAXE